Vigo cidade pesqueira

Vigo é a cidade da pesca en Galicia. A actividade pesqueira xera en Vigo, só a través do porto, 6.000 empregos directos, e as 357 empresas pesqueiras da cidade facturan máis de 3.000 millóns de euros cada ano. Está claro que nos gusta o peixe, verdade? E se a ti che gusta tanto como a nós, o máis seguro é que comeras ducias de veces algún procedente do porto de Vigo: aquí é onde se descarga máis peixe fresco de toda Europa.

Vigo é, ademais, unha das poucas cidades onde poderás vivir de preto todo o proceso da pesca e os seus produtos: desde os estaleiros, onde se constrúen os grandes barcos, á descarga, na impresionante lonxa de Vigo, un enorme edificio que cobra vida mentres o resto da cidade dorme, de madrugada.