Vigo Señorial

Rúa pola cidade burguesa

Un paseo pola arquitectura do Vigo señorial levarate ata finais do século XIX, cando a burguesía viguesa, en pleno apoxeo, comezou a encargar grandes edificios tanto para as súas residencias como para as sedes das súas empresas e institucións. Sacando o máximo partido da pedra, o material por excelencia da construción en Galicia, salpicaron a cidade de auténticas obras de arte.

Este paseo interactivo sae do barrio histórico, na parte alta, pola Porta do Sol. Alí xa se poden contemplar inmobles únicos, como o edificio Simeón ou El Moderno. Seguindo pola rúa Policarpo Sanz, os edificios señoriais van marcando o percorrido, destacando especialmente o Teatro García Barbón, do arquitecto Antonio Palacios.

O percorrido pola rúa Policarpo Sanz e pola súa continuación, a avenida García Barbón, supón a auténtica milla de ouro da arquitectura viguesa. Pero nas súas inmediacións hai moitos máis edificios destacables: á altura do edificio Curbera, a ruta desvíase á esquerda pola rúa Porto ata chegar aos xardíns da rúa Areal, onde verás edificios que marcan o carácter burgués daquela época.

De regreso cara ao punto de partida, é necesario un desvío para entrar na estreita rúa Marqués de Valadares, que discorre paralela ás de Areal e Policarpo Sanz, xusto entre ambas. Tamén nesta rúa hai varios edificios imprescindibles, dedicados orixinalmente a sedes de empresas, e varias construcións de tipo racionalista.

A ruta termina dirixíndose novamente á súa orixe, xunto ao porto deportivo do Real Club Náutico, fronte ao que se alza o Hotel Universal, que coa súa terraza foi hai décadas unha icona da cidade e cuxas pedras volven lucir desde hai uns anos todo o seu esplendor.

Descargar o folleto en PDF: http://issuu.com/turismodevigo/docs/vigo_se__orial

Pistas e recomendacións: 

 Goza dun refrixerio matutino nalgunha das cafeterías clásicas do Ensanche.

O contorno da rúa Porto e Areal é ideal para facer unha parada e tomar unhas tapas.

Galería de imaxes: 
Turismo de Vigo
Turismo de Vigo
Turismo de Vigo
Turismo de Vigo
Turismo de Vigo

Información práctica

Distancia: 2 quilómetros.

Duración do percorrido: unha hora e media con paradas.

Dificultade: media-baixa.

Tipo de ruta: circular.