Igrexa de Santa María

A Concatedral de Vigo, coñecida popularmente como A Colexiata, é un dos mellores exemplos da arquitectura relixiosa de Vigo, expoñente da arte neoclásica en Galicia e o templo máis importante da cidade. Enclavada en pleno barrio histórico de Vigo, erixiuse en 1811 sobre outra igrexa anterior. O templo, encargado a Melchor de Prado y Mariño, é de planta basilical con 3 naves, e ten unha fachada de ornamentación sinxela, en cuxa parte dereita destaca o Reloxo de Sol, que non está orientado ao sur, como é o habitual, o que o converte nunha peza singular. 

A Igrexa de Santa María alberga a imaxe do Cristo da Vitoria, sen dúbida o emblema relixioso máis importante de Vigo: sae de procesión o primeiro domingo de agosto, convocando a decenas de miles de fieis e é, ademais, o primeiro acto das Festas de Vigo.